Ang wika ay salamin ng Pilipinong kultura
Ito’y tunay na pamana at hiyas na mahalaga!
Pagdalumat at pagpapahalaga ay dapat ipakita,
Upang wikang pambansa ay mabigkas sa tuwina.
Wikang Ingles ay mahalaga, siguro nga ay tama sila
Ngunit Wikang Filipino, kalilimutan na nga ba?
Kung ang lahing pinagmulan ay tatalikdan ko pa,
Sino pang aasahan na lilingap sa kulturang minana?
Ang panahon natin ngayon ay totoong makabago;
Unti-unting nililimot, kultura’t pagkatao.
Mga minanang kagawian sa mga ninuno ko
Ibabaon na bang ganap sa ngalan ng progreso.
Sa panahon natin ngayon mas sikat pa ang Koreano;
Kolonyal na kaisipan laban sa nasyonalismo.
Masakit mang isipin pero ito ang totoo,
Na nabubulag sa husay nila ang kabataang Pilipino.
Wikang hiyas kung ituring dapat nating pagyabungin
Sa pakikipagtalastasan, atin itong gamitin!
Gen Z man o Millenial nawa ito’y ating tupdin
Dahil wika ay repleksiyon ng pagkakakilanlan natin.
Sa panahong makabago may tanging bilin sana ako.
Hiligaynon, Pampanggo, Sebwano at Ilokano
Waray man o Tagalog, Bikol o Chavacano
Wikang Filipino’y nag-iisang magbubuklod sa bawat tao.
Sa pagsikat ng internet at teknolohiyang makabago
Wala namang masama kung magsalita ng conyo
Ngunit mas kamangha-mangha kung salitang binibigkas mo
Ay wikang Filipino sa mayamang kultura ay salamin ito.