Bikolano, Ilocano, Pampangeno, Batangueno,
Ilonggo, Bisaya, Chavacano’t Cebuano
iba’t-ibang lenggwahe’t diyalekto
Subalit, bakit nagkakaintindihan tayo?
Tila bang pinagbibigkis ng kung ano
At nagkakaunawaan pa rin tayo
Pinag-iisa’t pinagkakasundo
Ng iisang salita, ang Wikang Filipino
Pinagsikapang makamit ng matagal,
kalayaang, maging buhay ay isinugal
mga ninunong nakipagbuno, nahapo’t napagal ang katawan
kasarinlan, sa wakas, nakamtan ng bayan
Ito’y nagbunsod sa pag-usbong ng Wikang Filipino
Na tatatak sa isipan ng buong mundo
Pagkakakilanlan ng lahing ito
Lahi ng matatapang, buhay inalay para sa kalayaan
Wikang Filipino, sariling atin ito,
may kakayahang pagbuklurin tayo
mayamang kultura, pinaiigting nito
bukod-tangi, pina-uunlad pa.
Wikang Filipino, turing ay simbolo
Ng ating kasaysayan, pagdurusa’t tagumpay
Dugo at buhay na ipinalit dito
Hindi matatawaran ninuman
Ang wikang ito ay daan
Sa pagpasa ng mayamang kultura
Upang sa mga henerasyong papalit
Sa damdami’t isipan, manatiling buhay at di mawaglit
Mapadpad man sa ibang lupain
Filipinong wika kapag sambitin
Banyaga’y sa iyo’y mapapatingin
Dahil nga bukod - tangi, ika’y mapapansin
Wikang Filipino, sa ating kultura’y sumasalamin
Taas-noo’t ‘di ikahihiyang gamitin
Bagkus ipangangalandakan pa’t
Mas lalong pagyayamanin.