I. Ang walang kamatayang kasabihan ni Gat. Jose Rizal
Dala-dala at nagiging gabay sa tuwina sa asal
"Na ang hindi magmahal sa sariling wika ay higit pa
sa isang malansa at nangangamoy na mabahong isda"
II. Kanyang ikinintal sa mga isipan ng mga Filipino
Gamitin, mahalin at linangin ang Wikang Filipino
Simbolo ng kalayaan ng bawat mamamayan dito
Sa bagong henerasyon ay maisulong ang pagbabago
III. Salamin ng mayamang kultura ang Wikang Filipino
Ginagamit mula sa simpleng pagsagot ng po at opo
Mapupuna ang pagmamahal, disiplina at respeto
Ito ay pagkakilanlan kahit saang panig sa mundo
IV. Kahit iba- iba pa man ang dayalektong ginagamit
Binubugkos ng iisang wika ang sinumang sasambit
Wikang Filipino ang sandatang panlaban mula langit
Sila’y magkakaintindihan, kapayapaan makamit
V. Isang sanggol ang ipinanganak sa bagong henerasyon
Napabilang sa pamilya na bubuo sa populasyon
Siya ay natutong magsalita’t makipag-interaksyon
Wikang Filipino ang kasangkapang bitbit sa maghapon
VI. Inalagaan, tinuruan at pinalaking magalang
Mapupuna mo na sa kanyang mga salita at galawang
Ang pakikitungo niya sa kapwa laging may katuwang
Wikang Filipino taglay na lakas sandata’t tumapang
VII. Ang paslit na ito ay nagkaroon ng mga kakilala
Mabubuting gawi’t pananalita naipasa niya
Wikang Filipino kasangkapan niya ay dala dala
Naipamalas, nailipat sa barkada't kakilala
VIII. Kung iisipin niyo mga tagabasa at kaibigan
Salitang namumutawi’t sa bibig na may kahulugan
Ay ang siyang huhubog sa isipan ng isang nilalang
Para impluwensiyahang gumawa nang may kabuluhan