Wikang Filipino, tanging kahulugan
Batis ng kultura at dakilang sandigan
Bawat salita’y likas na yaman
Ating pagkakakilanla’t salamin ng kasaysayan
Mga tula’t awit sa iyo’y nabubuhay
Mga kewntong bayan, sa iyo’y naglalakbay.
Sining at kagandahan, sa iyo’y binabahagi.
Wikang Filipino, diwa ng ating lahi.
Mga tradisyon at kaugalian, sa iyo'y nadarama,
Paggalang at pagmamahal sa bayan, sa iyo'y nagmumula.
Sa “Po” at “Opo’y” iyong ipinabatid
Wikang Filipino, ika’y bukod tangi.
ABAKADA’y naging unang hakbang
Para sa malawak na kaalaman
Mga pangarap at adhikain sayo’y naglalapat
Wikang Filipino, ikay walang katulad.
Wikang Filipino, ikaw ay kabiyak ng aming gunita
Ikaw ang sandata, saan man magpunta
Wikang Filipino, ikaw ay aming pagkakilanlan
Ikaw ang aming nakaraan, ngayon at kinabukasan!