Bagyo man o pandemya ang ating kaharapin
Paghahawak kamay magiging sandata natin
Sapagka’t sa puso’t isipan di alintana
Paghihirap tatahakin sa tuwi-tuwina!
Halina’t palakasin tiwala sa Maykapal
Hamon sa buhay harapin, walang labing katal
Huwag hayaang pangamba’t pag-aalinlangan
Pumasok sa buhay, sa gitna ng kahinaan
Tayo ay magkaisa sa ganitong panahon
Tayo’y makiayon, makisama sa pag-ahon
Mangarap tayo’t bumangon sa muling pagsilay
Nang Liwanag ng araw na nagbibigay buhay
Habang sinasalamin ng tapang ang mga mata
Lumilikha ang tao ng puwang sa bawat isa
Sapat na pagtitiwala ay lagging isipin
Walang sukuan, tuwina ating pagtibayin.
Halina’t samahan bansa nating bumabangon
Kahirapan di hadlang sa nagpilit umahon
Binalikat lahat ng pagsubok at karimlan
Makamit lang ang kaligtasan at kaayusan.