Sinag ng pag-asa makakamtam pa nga ba?
Bagsik ng pandemya naghari saanman magpunta
Takot at pangamba bumalot sa bawat isa
Maibabalik pa ba ang sigla at saya?
Tila baga nagbago ang ikot ng mundo,
Maging ang edukasyon di nakaligtas dito
proseso ng pagtuturo at pagkatuto biglang nagbago
Dating silid-aralan lugar ng pagkatuto
ngayon teknolohiya ginamit ng mga guro
upang paglinang ng kaalaman muling mag-ibayo.
Agam-agam, takot, at pangamba sa isipa'y gumugulo
Sa di malamang karamdaman na pumupuksa ng tao
Ngunit ang edukasyon ay hindi dapat mahinto, mabaon sa limot o maglaho
Pagkat ito lamang ang tanging susi upang karunungan ay tunay na matamo
Sa kabila ng banta na dulot nito, sa kalusugan at kaligtasan ng mga tao
Hindi nagpatinag, tumindig at lakas loob na tumayo
Sa pag-asang muling magbabalik mga sandaling unti-unting naglalaho
Sakit at pighati man ang namayani
Manalig sa Panginoon palagi
Pananampalataya sa Kanya ang siyang dapat na maghari
Upang sinag ng pag-asa sa gitna ng pandemya ay hindi mapawi.