Pilipinas, kapag sinusubukan ng tadhana, sunod-sunod na unos ipinapadama
Likas man o tao ang may gawa, kung bayuhi’y matindi ang tama
Inyo bang naalala ang malalakas na bagyo na dumaan sa bansa?
Baya’y tila’y pinarusaha’t pinadapa, at halos sa mapa’y mabura
Andiyan rin ang pagsabog ng bulkan,
Pagbaha dulot ng matinding ulan,
Maging tagtuyot o El Nino,
Lindol at pati na rin delubyo
Ngayo’y muling sinubukan tayo
Pandemyang tumama sa buong mundo
Kumitil ng milyon-milyong tao
At halos magupo sa sirang natamo
Sa gitna ng hinagpis, takot at pangamba
May araw ding sisikat na magbabadya ng pag-asa
Mga dagok sa buhay, kusang lilipas
At iyon ang paghuhugutan ng lakas
Kaya nama’y, sa bawat suliranin
Na kakaharapin,
Buong tapang na susuungin,
Gagamiting sandata’y panalangin
Ga-bundok man na dagok
at madapa pa sa pagkakalugmok
Pilit pa ring babango’t
haharapin ang pagsubok
Tulad ng matatag na puno
Paulit-ulit man bayuhin at igupo
Ng nagngangalit na hanging bugso
Makikipagsabayan lang na parang nakikipaglaro
Matatag at di madaling sumuko
Sumasalamin sa tunay na dugo’t tatag ng mga Pilipino
Wari’y ipinanganak na sadyang ang loob ay buo
hindi basta tutumba, pandemya man o bagyo.