·
O Pilipinas, likas and iyong tatag
Pinagbuklod ng malasakit at sipag
Pinatibay ng pananalig at husay
Pinanday ng oras at hamon sa buhay
Sakuna, lindol, bagyo o sa pandemya
Di ka susuko, lalong di ka tutumba
Bagkos ika’y tatayo’t muling babangon
Magpapatuloy sa pagsulong sa hamon
Ang ating Maylikha ang iyong sandigan
Armas ay panalangin at kabutihan
Tiwala sa sarili at iyong kapwa
Nagbibigay pag-asa sa kaluluwa
Hambalusin ka man ng bagyong madahas
O tamaan ng pandemyang walang lunas
Muli kang susuong at buong aahon
Magwawagi sa pagsubok ng panahon
Kaya Pilipinas hindi ka tutumba!
Sa iyong tikas walang maikumpara
Dahil sa mamamayang nagkakaisa
Sa pananalig, pag-ibig at pag-asa