Bawat pyesa ay may iba’t ibang paksa
Tiyak na hahaplos sa damdamin ng mambabasa
Maaaring ito ay pighati o maghatid ng ngiti sa labi
Sa bawat pahina, ito ay ating makikita
Gabi-gabing sa ati’y nagbabadya ang unos
Sa mga sakuna, karamihan ay hikahos
Kakulangan sa kagamitan, pagkain ay kinakapos
Paano ito matatapos? Tayo ba ay makakaraos?
Sa mga bagyong nanalasa sa bansang Pilipinas
Bawat lugar dito ay talagang nakaranas
Kahit ayaw natin ay hindi makaliligtas
Ito ang ating kapalaran na walang sinuman ang makaiiwas
Umabot sa ilang libong buhay ang kinitil
Panahon ng pandemya na hindi masupil
Pagtaas ng bilang ay hindi mapigil
Kaya’t sa pangangalap ng solusyon ay hindi tumitigil
Binagtas na natin ang bawat daan
Atin nang nasilayan lahat ng pinagdaanan
Ngunit di tayo nagpatinag, anuman ang hirap sa nakaraan
Atin itong malalampasan hanggang sa kasalukuyan
Sa mga pahinang ito ay aking nabanaag
Mga paksang sa akin ay bumabagabag
Pilipino’y di tutumba
Sa katotohanan wikang mapagpahayag ang sandata
Ilang libong katha pa ba ang aking mababasa?
Anong mga paksa pa kaya ang aking makakasalamuha?
Tiyak na makatutulong lalo na sa aking paglikha
Anumang pagdaanan ako’y patuloy na susulat ng tula
Sa muling pagsikat ng bukangliwayway
Panibagong pahina ang ating maisasabuhay
Huwag nating sayangin at ating iaalay
Sa Poong Maykapal na sa atin ay nagbigay ng buhay