Ang AKO na may sariling paniniwala
Paniniwala na iba sa IKAW
Ngunit sa TAYO mithiin ay iisa
Pag-ibig ang susi sa pagkakaisa
Kahit wika ay iba-iba.
Ang AKO na sa tradisyon umaayon
Nilalayon din ng isang IKAW
Magkaiba man sa pagkakausal
Pagal ng TAYO ay di matutumbasan
Pagkat TAYO ay iisa anuman, saan man.
Pamumuhay ng AKO, buhay ng IKAW
Sa karukhaan o kaabundahan man
Paraan ng TAYO ay mababanaagan
Dugong Pilipino dumadaloy, umaapoy
Nang ang AKO at IKAW tagumpay ay patuloy.
Sa mga pangaral ng mga magulang
Lengguwahe may iba-iba, imahe nais ibandera
Taglay ng AKO, TAGLAY ng IKAW
Bakit uunawain? Bakit iintindihin?
Pilipino TAYO! Angat, mangingibabaw sa mundo.
Cuyunon, Hiligaynon, Ilokano, Ibanag, alinmang Tribong Pilipino
Magadal ako, ma-eskwela ako, agiskwela ak, magiskwela nga
Linyahang tatak Pilipino, gaano man ang hirap
Asam na karangalan, dulot ng paaralan
AKO, IKAW, TAYO, edukasyong hangad, dapat at sapat.
Relihiyon ng AKO, iba sa IKAW
Iisa ang TAYO, sa lumikha nagpupugay
Usal na dasal, ingatan at gabayan
Iisa ang pinatutunguhan, mag-unawaan, magmahalan
Buhay ng lahat, SIYA ang pinagmulan!
Mama, papa, nanay, tatay, ina, ama, Ate, kuya, manong, manang
ading, adong, bunso, dodoy, otoy, at dodong
Anumang katawagan, nag-uunawan, nagtutulungan
Magiliw sa bisita, pagmamahal ang dulot sa kapwa
AKO, IKAW, TAYO, Pilipinong makapamilya.
Wikang Filipino, mga lengguwaheng sumasalamin sa pinagmulan
Kaysarap pakinggan ating ipangalandakan
AKO na may pusong IKAW
IKAW na may hangad tulang ng AKO
TAYO ay iisa, TAYO ay Pilipino!