Pitong araw ika'y nilikha ng Diyos
Bansang pinatatag ng pagmamahal na walang tapos
Mga sakuna't delubyo ika'y sinubok ng lubos
O aking Pilipinas mananatiling nakatayong taos
Ika-pitong araw ng Marso taong 2020 nagsimula
Lokal na pagkalat ng sakit nananalasa sa ating bansa
Pandemyang naghasik ng lagim nakakagitla
O aking Pilipinas di matitinag ang pag-asang tinitingala
Pitong araw dalawamput apat na oras na sana'y wala ng wakas
Pamilya'y pusposang nakasama habang bawal ang paglabas
Ekonomiya may bumaba at mga trabaho'y may napinsala
Pagmamahal ng Pilipino sa bansa at kapwa hindi mawawala
Pitong libo at higit pang mga isla sa atin biniyaya
Taglay ang mga likas na yamang banal at marangya
Datapwat sinubok ng mga bagyong di kaaya-aya
O Pilipinas iyong pagbangon aming hangad at hiraya
Pitong taong agwat mayroon ang dalawang sigwang makunat
si Yolanda't Rolly na parang alamat at halos sinira ang lahat
Bagamat ika’y dinurog at binagsak ng bigat na parang walang hanggang habagat
O aking Pilipinas ika’y umangkat sa kabila ng karanasang nakakagulat
Pitong letrang salita aking ibabandila habang ako'y buhay pa
Watawat ng aking bansa walang sawang sinasamba, ito'y aking panunumpa
Tanging adhika ay mailathala iyong mga isla, ganda at mga lupa
Silakbo ng pusong Pilipino nakaangkla sa iyong diwang laging nakasampa
Pitong kulay mayroon ang simbolo na sa bayan ko’y nagbigay buhay
Ika'y lupang hinirang aming pag-asang kumikinang sa bukang-liwayway
Tatag at tibay aming alay, tayo’y babangon sabay-sabay
O Pilipinas, ikaw ang aming bahagharing may pitong kulay na taglay