I
Nakita ko daw ano gid kamo kamapalanggaun,
Ang gab-i, ginahimo nyo nga adlaw
Basta may talahion, dawaton.
Para makabakal pagkaon namon,
Kag mabayran lang ang arkila sa pwesto
II
Naglabay ang mga tuig,
Ang sakripisyo nyo, nag-bunga
Nakahuman kami nga mga anak nyo.
Ang iban sa amon, nag-alasawa,
Nagpalayo kay may pamilya na.
III
Pero, sa gihapon,
Padayon kamo sa pagpanahi.
Biskan hinay na ang sikad sa makina
Luya na ang kamot sa pag-wales,
Indi na kaklaro ang mata sa dagom.
IV
Wala gihapon kamo nag-undang,
Hasta mahurot ang hilo,
Kag ibilin ang tuktukon nga makina,
Sa balay nga naghilay
Handumanan nyo sa pagpalangga.